افتتح الرئيس عبد الفتاح السيسى، اليوم الثلاثاء، عددا من المشروعات العملاقة في قطاع الكهرباء والطاقة، في عدد من المحافظات من خلال «الفيديو كونفرانس»، من العاصمة الإدارية الجديدة، أبرزها «محطة توليد كهرباء بني سويف المركبة، ومحطة توليد كهرباء البرلس المركبة، ومحطة توليد الكهرباء بالرياح في جبل الزيت بمحافظة البحر الأحمر، ومحطة توليد الكهرباء بالعاصمة الإدارية الجديدة، ومحطة محولات غرب مغاغة بالمنيا، ومحطة محولات بنيان بمحافظة أسوان، ومحطة محولات وادي النطرون بمحافظة البحيرة، ومحطة محولات بدر بالقاهرة».
وحضر الافتتاح الدكتور مصطفى مدبولى، رئيس الوزراء، والمهندس شريف إسماعيل رئيس الوزراء السابق، والوزير محمد عرفان، رئيس هيئة الرقابة الإدارية، وطارق عامر محافظ البنك المركزي، ومحمد شاكر وزير الكهرباء، وعدد من الوزراء وكبار رجال الدولة.
وتستعرض «بوابة أخبار اليوم» أبرز تصريحات الرئيس السيسي خلال الافتتاح.
وأشاد الرئيس عبد الفتاح السيسى، خلال كلمته، بشركة « سيمنز » لدورها في مساعدة مصر في تدعيم شبكة الكهرباء، قائلًا: «الشركة ساعدتنا في رفع كفاءة التشغيل للعمل فى درجات حرارة أعلى من الظروف الطبيعة التي يتم التعاقد عليها، نظرًا لارتفاع درجات الحرارة في مصر».
وأضاف: «كل النقاط التي طلبناها من الشركة تم تنفيذها رغم التوقيت الحاسم والمحدود، والذي كان يمثل تحديًا كبيرًا لنا، كما ساعدتنا في التكلفة، وأنا باسم المصريين والدولة أتوجه بالشكر لهم، لأن كل ما طلبناه أمر غير مسبوق في أي عقود عالمية».
ووجه الشكر لوزير الكهرباء، محمد شاكر، قائلا: «بشكرك على العرض اللي حضرتك عرضته والشرح اللي شرحته لينا، وأنتهز الفرصة وبقول للمصريين، عايز نفتكر سنة 2014، ورد فعلنا إزائ على موقف الكهرباء».
وتابع رئيس الجمهورية: «كان قدامنا خيارين إننا نعمل إجراء، ونرمم الحالة بتاعتنا، وإننا ندخل الخطة العاجلة، وتبقى الشبكة بتاعتنا بنفس مستوى الشبكة اللي كانت جيدة من 40 خمسين سنة، لكن حصل تطور كبير، وقت الشبكة كنا 20 مليون إحنا بقينا 100 مليون».
وأوضح الرئيس: «كان ممكن نكتفي بحل والمسكنات، ودا مهم أؤكده نحن لا نعمل أمور نص ونص, نص ونص مافيش.. هعمل إصلاح اقتصادي 100%، عشان البلد دي تقوم مرة تأنى ومحدش يقدر يوقعها.. إحنا بنعمل حاجتنا 100% وعلى أعلى مستوى".
وذكر: «محطة الضبعة تتكلف تريليون جنيه، قطاع واحد بيعاد صياغته وتجهيزه، لتساوى الدول المتقدمة.. عايز 100 مليار دولار».
كما وجه الرئيس عبد الفتاح السيسى، سؤالا لمحمد شاكر وزير الكهرباء، عن موعد الانتهاء من شبكات نقل الكهرباء، قائلا: «شبكات النقل الـ6000 كيلو؟ هم دول هيخلصوا امتى؟».
ورد محمد شاكر: «حضرتك أمرت إنهم يخلصوا في 2019، لكن اسمحلى حضرتك هنأخر جزء في ربط المحطة النووية والحمراوين، ودا بمقدار 750 كيلو، إحنا هنخلص قدرات أكثر من 5000، وممكن نزود كمان عشان حضرتك أمرت أن شرق العوينات نحسن مستوى الطاقة هناك، وهنزود حوالي 450 ميجا».
ورد الرئيس السيسى: «يعنى إحنا ميعادنا 2019، إحنا ميعادنا 2019، بلاش 2025»، ورد وزير الكهرباء:«بلاش 2025 دي يا فندم.. هغيرها».
وأكد أن مصر تشهد الآن قفزة كبيرة في كل شيء، مطالبًا المصريين بضرورة أن يفخروا بأنفسهم، قائلًا: «يجب أن تفخروا بأنفسكم وتكونوا سعداء بما أنجزتموه لأنكم أنتم من عملتم بكل هذه المشروعات».
وقال إن كفاءة الأداء في المحافظات لا تقل عما سيتحقق بالعاصمة المصرية، معقبًا: «لا نقوم بأنصاف الحلول بل نقوم بالحلول الحاسمة، وما نقوم به يكفى مصر لـ10 و 15 سنة».
ووجه السيسي رسالته للمفكرين والمثقفين والإعلاميين، قائلًا: «لما تتصدى للموضوع يجب أن تكون على علم ومعرفة وفهم به، فالدولة تعمل منذ 4 سنوات بخطة غير مسبوقة وما تحقق في عالم الكهرباء والطاقة خيال، فخطوط الغاز لتغذية المحطات تصل تكلفتها لـ 4 مليار جنيه».
وطالب الرئيس عبد الفتاح السيسى، المصريين بالصبر والتحمل، قائلًا : «محدش يقدر أبدا يحبطنا، وكل المطلوب اصبروا وسترون العجب العجاب في مصر، لأني مش بعرف أعمل حاجة نص ونص.. ناخد الأمور بجدية ومسئولية وإصرار وتحمل».
وأشاد بجهود وزارة الكهرباء فى حل مشكلة الطاقة التي شهدتها مصر قبل 3 سنوات، قائلا: «من 3 سنوات وأكتر كان فيه مشكلة كهرباء في مصر، كانوا بيقولوا شيل الدكتور شاكر من الوزارة، يأخد المشكلة ويبقى ضحينا بواحد،.. ده كلام عجيب ولا يليق بالشرفاء واللي بيفهموا».
وأضاف: «يبقى معايا إنسان عظيم ومحترم وفاهم شغله وعارف مساره وعلشان مشكلة لسه بنعالجها أقوم أضحى بيه علشان أعيش.. دا كلام لا يليق بالرجال.. والراجل بيقف جنب رجالته ما دام هما رجال حقيقيين، يقف جنبهم ويساعدهم».
كما أشاد الرئيس، بدور وزارة البترول في حل أزمات قطاع الكهرباء، مشيرا إلى دورها في توفير الغاز ومشتقات المازوت في تشغيل محطات توليد الكهرباء.
وتابع الرئيس، خلال كلمته: «في موضوعات موجودة في مصر مش متظبطة من زمان لظروف مصر، وزارة البترول كانت بتستلف عشان تجيب البترول لتشغيل محطات الكهرباء، فى حاجة بتتعمل ببلاش؟».
واستطرد: «في دول كتير أوى معندهاش خمس الطاقة الكهربائية اللي كانت موجودة عندنا في 2013، مافيش حاجة ببلاش، أرجو إنها تكون حاضرة لكل اللي بيسمعونى، وزراء ونواب ومسئولين».
وأضاف: «قيادة الدولة فيها 100 مليون، دا موضوع مش بيتحل بالأكل والشرب، قسما بالله لو كان الموضوع وجبة واحدة فى اليوم لبناء أمة أقسم بالله لأقعد بقية عمري كله أكل وجبة واحدة».
وأكد الرئيس السيسي، أن شركة «سيمنز» الألمانية لم تستغل ظروف مصر واحتياجها للطاقة فى تحقيق صفقات وتحقيق عائد أعلى، مؤكدا أن الشركة قدمت خدمة كبيرة، لأن العائد الذي حققته من المحطات ليس كبيرا مقارنة بالأسعار العالمية.
وخلال جولته، حرص الرئيس عبدالفتاح السيسي، على مصافحة العمال والمهندسين بمحطة الكهرباء العملاقة بالعاصمة الإدارية الجديدة.
