حل المطرب المهرجانات عمر كمال ضيفًا، على برنامج خلاصة الكلام الذي تقدمه الإعلامية أميرة بدر، والمذاع عبر شاشة قناة النهار، والذي علق خلاله، على بعض التصريحات والأخبار التي تداولت عنه في الفتره الماضية.
وكشف عمر كمال عن سبب عدم حلوله ضيفًا على الفنان رامز جلال، في برنامج المقالب الشهير رامز جاب من الآخر، الذي عرض خلال شهر رمضان 2024.
اقرأ أيضا| سر بكاء شيرين عبد الوهاب في حفل الكويت؟
وقال عمر كمال: "كنت عارف أنهم عايزين طرف تاني يطلع معايا وأنا مرضتش، وأنا مكنتش عايز أظهرها للجمهور معايا أصلًا في صورة واحدة، وهما كلموني وعرفت أنهم هيجبوها، وأنا رفضت وقولت مش هروح".
وتابع: "مش حابب أن اسمي يرتبط بالعلاقة دي، ومحبتش أن اسمي يتحط معاها، ومش فارق معايا الفلوس بتاعة البرنامج الحمد لله ربنا كارمني".
كما أضاف أيضا: لأول مرة تفاصيل ارتباطه بـ ندى الكامل، طليقة الفنان أحمد الفيشاوي، وسبب انفصالهما، وقال عمر كمال، «أنا مبحبش اتعرف بموضوع عاطفي أو شخصي، وزعلت لما علاقتي اتعرفت لأن مردودها عند الناس مكنش كويس ومش عارف الناس شافت الموضوع إزاي".
وتابع "أنا في الفترة دي مكنتش متزن نفسيًا ومكنتش بنام غير بأدوية ومهدئات، وسلوكي مكنتش مظبوطة، والأدوية كانت مأثرة عليا لدرجة أن ممكن حد ياخد مني مبلغ وأنسى خالص، وكنت باخد الأدوية دي بدون علم وناس وصفتلي ودخلت في متاهة، والموضوع قلب معايا بهلوسة، ومرة مدير أعمالي راح جابني من على الدائري وأنا خابط العربية، وتاني يوم معرفتش أني عملت كده، والسنة والنص دي أثرت على شغلي".
وأضاف: "ممكن الغلط يكون من عندي لأني عملت في نفسي كده، هي مكانتش فاتحة خير عليا والمفروض الإنسانة اللي معايا لما تلاقيني بميل ناحية الغلط متميلش معايا لأ تعدلني، تجربة مكانتش حلوة عليا السلبي فيها أكتر من الإيجابي، وأنا اللي خدت قرار الانفصال لأني كنت بقع ومش نفسي، أنا حبيتها أكيد ولكن التجربة ضرتني".
واستكمل عمر كمال، قائلا: "ربنا حبيبي، وفي كل موقف في حياتي كنت هقع فيه شالني، وربنا ده ممكن يكون علشان أمي أو إخواتي أو خير بعمله أو علشان براعي ربنا في فرقتي، أنا دايمًا بصحي نفسي ودايمًا عندي النفس اللوامة، وطول ما أنا بدخل ربنا في طرف الميزان همشي كويس".
وأشار، قائلا: "ممكن أكون في علاقة وعصيت ربنا، فا ربنا يديني قلم ويكسرني علشان يسمع صوتي، وأنا فوقت وحاولت ترجعني وأول ما أتأكدت أني مش راجع شوفت الوش التاني، وناس تانية ظهرت، طب ده أنا قرأت دراسة بتقول أن الشخص الطبيعي السوي العادي علشان يطلع من علاقة ويستشفى منها عايز 6 شهور، وبدأ ربنا يبينلي حكمته وأن قراري صح".
ونصح عمر كمال، صديقه مطرب المهرجانات حسن شاكوش قائلا: "نصحت حسن شاكوش أنه يسكت، إمساك بمعروف أو تسريح بإحسان، كنت بزعل لما بيرد ولو هي ليها حقوق إديها ليها، ورد الاتنين كبر الموضوع، وأنا محبش أتعرف بموضوع شخصي أو عاطفي".
وعلق عن حلقة حسن شاكوش، وريم طارق في برنامج رامز جاب من الآخر، فعلق عمر كمال: "حلقة حسن شاكوش وطليقته في برنامج رامز، أظن أن حسن مكنش يعرف، ولو كان يعرف مكنش هيروح، وأنا بتأذى نفسيًا وبزعل لما يكون اتنين شوفت بدايتهم وتبقى نهايتهم بالشكل ده، ومعرفش إيه اللي حول الدنيا كده، أنا عاشرت حسن في كل حاجة، أكيد في حاجة بينهم محدش فيهم قالها، ولكن أنا مبشوفش حسن بشع بالدرجة دي".
وتابع عمر كمال: شوفت حسن متقبل الدنيا وكان ممكن يكمل لو اتقال كلمة كويسة، ولكن رد فعل طليقته كان مبالغ فيه.
وتابع: "أنا طالع من حارة وحتت بسيطة، ومكنتش أتخيل في يوم أن ربنا هيوصل صوتي لبلد بينا وبينها 16 ساعة طيران، والناس ممكن تعرف أني جاية الحفلة ولكن استحالة أن حد يتعرف عليك في أمريكا، ولما واحدة عرفتني وأنا بتعشى كنت حاسس أني عايز أرجع مصر أهد الدنيا".
عمر كمال والسطو المسلح بأمريكا
واستكمل: "لما روحت أمريكا بعد كورونا بسنة مكنتش أعرف إنجليزي، وكان معايا راجل بيترجم ليا، ونصحني وقال لي هات 1000 دولار وحطها في بنك أمريكي وافتح حساب وهتنفعك في الغلاء، وكنا في لوس أنجلوس وأنا هوسي في الحياة الأفلام الوثائقية وكنت قرأت تقرير أن لوس أنجلوس فيها يوميًا 50 حالة سرقة لبنوك، لكن قلت استحالة ده يحصل فيا وكنت منبهر بالنظام".
وأضاف عمر كمال: "كنت قاعد وماسك الموبايل لقيت راجل بيزعق مع الست اللي على الشباك، وضرب على الإزاز، والراجل اللي جمبي قال لي خلي بالك لو هتعرف تزحف وتطلع بره أو نام على بطنك وحط إيدك على راسك، قلت له ليه، قال لي الراجل ده معاه قنبلة وهيفجرها، وأنا كنت فاكر فيه مشكلة في الحساب لكن كان بيقول لو محطتيش الفلوس هفجر الدنيا كلها".
وتابع: «قلت للراجل أنا ههرب وأنت، قال لي أنا بصور علشان لو نجينا هبيع الفيلم ده، من وقتها اتعلمت اخد كورسات انجليزي الحمدلله الحساب ما تفتحش والـ 1000 دولار مراحتش علي".
مواصفات فتاة أحلام عمر كمال
وكشف عمر كمال، عن المواصفات التي يتمنى تواجدها بشريكة حياته، مؤكدًا أنه لا يريد الارتباط بـ شخصية مشهورة،وقال "عمر: "أنا ماليش صاحب في الرحلة يمشي معايا مشوار طويل، ونفسي طبعًا يكون في واحدة تمشي معايا الرحلة، والمهم أن هي تيجي تبني معايا مستقبلي مش جاية تبني مستقبلها هي، ونص اللي بقابلهم جايين يأمنوا مستقبلوهم هما، ودول أغبياء جدًا وبيبانوا في الأول، ولكن في بنات طيبة وغلبانة ولكن مبتعرفش تتعامل معايا وأنا محبش ارتبط بـ بنت معروفة".
وتابع عمر كمال: "أنا واحد حياتي كلها مشغولة وعايز واحدة شغلها الشاغل عمر، وأنا هدلعها وهتبقى ست الدنيا كلها وهتلف معايا العالم كله، وأنا اللي هتجوزها مش هيكون ليها تطلعات في الشهرة".
برنامج "خلاصة الكلام" يعرض يومي الخميس والجمعة على شاشة النهار، في تمام الساعة الثامنة مساءً، تتناول خلاله الإعلامية أميرة بدر، العديد من القضايا المثيرة للجدل، وتستضيف أيضًا عددًا من الشخصيات العامة ونجوم الفن والرياضة وغيرهما من نماذج مؤثرة.
