«كل سنة وأنتِ طيبة.. وأنت طيب.. كل سنة ومصر طيبة قبلنا وبعدنا.. مصر طيبة زي زمان.. زي أيام الطيبة والسكينة والآمان والحب.. زي ما عرفناها كلنا لما اتولدنا.. ولما عشنا ولما كبرنا فيها».
«كل سنة بالمعني البسيط للكلمات.. وبالمعني الطيب للطيبة.. الطيبة اللي ماكناش في مصر بنحاول نتعرف عليها لأنها كانت هي الحقيقة الوحيدة اللي عرفناها ونشأنا عليها.. واللي رضعناها واحنا صغيريين.. واللي اتعلمناها في المدارس.. واللي قابلناها في الشارع.. واللي رحنا بيها مدرستنا..واللي حيينا بيها علمنا.. واللي أقسمنا عليها في أخلاقنا».
« كل سنة بالمعني اللي غنينا بيه كل أغاني الحب.. بكل معاني الحب وبكل لغات الحب وبكل تفاصيل الحب وبكل حبنا للحب.
«كل سنة واحنا متجمعين وسط أهالينا بنفس الأماني البسيطة اللي كانت بتملا حياتنا بالخير.. واحنا مصدقين الأحلام الجميلة.. واحنا قادرين علي فعل الخير.. وعلي تصديق التفاؤل.. وعلي إبعاد شبح الحزن».
« كل سنة واحنا قاصدين نرجع عقارب الساعة للخلف، واحنا متعاهدين نرجع حبنا لبعض.. ونرفض ظلمنا لبعض.. واحنا عارفين حق كل واحد فين علي بعض».
« كل سنة واحنا عارفين بجد يعني إيه شهر كريم.. ويعني إيه حق الصيام.. وحق الصلاة وحق القيام وحق الالتزام.. وحق رسولنا الكريم.. وحق ربنا».
« كل سنة واحنا محققين معني الإيمان.. ومعني التسامح.. وعارفين يعني إيه أم ويعني إيه أب ويعني إيه أخ ويعني إيه أخت ويعني إيه أهل ويعني إيه وطن وبلد».
«كل سنة واحنا مؤمنين بالسلام.. ورافضين العنف.. وكافرين بالإرهاب.. ومصرين علي ديننا دين الرحمة.. وعلي سماحتنا مع كل الأديان.. وعلي حبنا للجامع.. وعلي احترامنا للكنيسة».
«كل سنة واحنا عارفين مين هم بالضبط أعداؤنا.. ومين هم أصحابنا.. ومين هم أهالينا.. وعارفين نتفق مع مين ونختلف مع مين ونصدق مين ونكذب مين».
«كل سنة واحنا في انتظار سنة جديدة جاية.. ونفوسنا صافية.. وأولادنا فرحانيين بمستقبلهم.. وبلدنا عايشة آمانها».
>> مسك الكلام..
كل سنة ومصر طيبة.. ومش مجروحة ولا مطعونة.. ولا حزينة ولا محزونه.. كل سنة ومصر مصر.. يارب!
